“Ихлас” мәчетендә Мәүлид мәҗлесе. Киемнәр күргәзмәсе.
28 ноябрь көнне “Ихлас” мәчетендә Мәүлид аена багышланаган мәҗлес булып узды. Чара кунагы итеп шәһәребез имам-мөхтәсибе Әлфәс хәзрәт Гайфуллин чакырылган иде. Мәчеттә Җомга намазын да ул алып барды. Намаздан соң мәхәллә халкы мәчетнең аскы катында әзерләнгән аш өстәле артында җыелды. Мәҗлес барышында “Ихлас” мәчете тормышында актив эш алып барган картларны тәбрикләделәр.
Шул үк көнне кичке намаздан соң ГЭС бистәсендә урнашкан “Каир” банкетлар залында “Фарыздыр киемең, мөслимә” исемле чара уздырылды. Әлеге чарада “Habibi” мөслимәләр өчен кием кибете Чаллы мөслимәләре берләшмәсе һәм мөхтәсибәт белән берлектә мөселман хатын-кызлары өчен көзге һәм кышкы көндәлек тормышта кию өчен әзерләнгән күлмәкләр күргәзмәсе оештырды. Чара дәвамында революциягә чаклы татар хатын-кызлары киемнәре хакында, мөслимәләрнең киенү кагыйдәләре сөйләнде һәм “Habibi” кибете турында шигырь язу конкурсы уздырылды. Шулай ук килгән халык арасыннан 24 елдан артык яулык кигән хатын-кызларны һәм Чаллы шәһәре мөслимәләре тормышында актив катнашучы ханымнарны бүләкләү булды.
