Рамазан алды балалар хәйрия ярминкәсе
Яр-Чаллы мөхтәсибәте , “Тәрбия” үзәге, “Эврика” шәһәр мәдәният үзәге белән берлектә 19 март , якшәмбе Рамазан алды балалар хәйрия ярминкәсе оештырды.
Ярминкәдә балалар үз куллары белән ясаган эшләнмәләр, тәмле әйберләр уенчык- китаплар саттылар. Һәр бала үзенең сату урынын үзе оештырып, үзе бизәде.
Ярминкә “Нур ” ансамбле чыгышы белән башланып китте, балалар сату эшенә керешкәнче ниятләрен барладылар: керемнән зәкәт өлешен (40/1) мөмкинлекләре чикле бала тәрбияләүче гаиләгә тапшырылачак.
Ярминкәдә сату эшләре сәхнәдә чыгышлар белән үрелеп барды. Балалар шигырьләр сөйләделәр, Рамазан турында хәдисләр белүләрен көрсәттеләр һәм үзләренең товарларын рекламаладылар. Шулай ук күпсанлы мөслимә кардәшләребез дә ярминкәгә махсус балаларны хуплау өчен килделәр. Ярминкә азагында балалар сәхнәдән “акцияләр” һәм ташламалар игълан итә башладылар. Ярминкә оештыручылары үз чиратында ” Чүп җыям- кәнфит бирәм” акциясен оештырды, шулай итеп балалар Эврика үзәген чип-чиста җыештырып, үзләре артыннан тәртип калдырып киттеләр.
Рамазан алды хәйрия ярминкәсе 10нчы ел рәттән үтә, быел балалар җыйган хәйрия ярдәме 16153 сум акча тәшкил итте. Акчалар ДЦП авыруы белән яшәүче малайның гаиләсенә тапшырылды, ул реабилитациягә тотылачак.
Сатусы буларак ярминкәдә 60лап бала катнашты, “сатып алучы” гаиләләр саны 200 дән артык иде.
